Kur pasioni kthehet në profesion, peshkatari që u kthye në guidë për turistët

Rikthimi në Shqipëri pas emigracionit nuk ishte i lehtë, për Ramiz Dajkon nga fshati Xarrë, i Konispolit.

Zgjodhi të punonte si peshkatar në kanalin e Vivarit, në Butrint, derisa aty të kuptonte se ishte vendi i duhur per të bërë ture turistike.

“Në 2010 u ktheva në Shëipëri, edhe mendoja që aty kam punuar bojaxhi, o të merresha me atë, o me detin. Po më teper më tërhiqte deti, peshkimi. 4-5 vite më vonë pash që kishte interes, na flisnin turistat. Fillimisht kishte interes, i çonim në kalanë e Ali Pashës, më vonë filluan turet e midhjes, për plazhe, për peshkim”, tha ai.

Qindra mijëra turistë të huaj që vizitojnë Butrintin, duan të zbulojnë përmes varkave të vogla, gjire të virgjera, florën, faunën, Kalanë e Ali Pashës e ishullin e Tongos qe ndodhet përmes Kanalit të Vivarit.

“Turistat shohin shpendë të ndryshme gjatë kanalit, ecja është shumë e ngadaltë, vemi deri te kalaja.

Lartë në liqen bëjmë turin e midhjes, për të parë si rriten si zhvillohen midhjet.

Shkojmë deri në kufi me Greqinë, 50 minuta larg nga këtu, që turistët kënaqen është dhe i fundit ishulli i Tongos”, tha ai.

Turistët që preferojnë ture të tilla janë moshave dhe vendeve të ndryshme, ndërsa 62 vjeçari pohon se kërkesa për ture është më e madhe se sa mundësitë e operatorëve atje.

“Vijnë nga të tëra vendet e botës, mosha të ndryshme, vitet e fundit kanë ardhur edhe nga india.

Edhe nuk ia dalim dot me fluksin që ka…. Saranda dhe Ksamili kanë një fluks shumë të madh turistësh”, tha peshkatari.

Për Ramiz Dajkon deti është më shumë se puna që i sjell të holla.

“Ndjesia e detit për mua është shumë e madhe, nuk rri dot pa detin, pa peshkimin, është çlodhje për mua”, tha ai.

Turizmi me varka dhe anije po merr hov vitetet e fundit në të gjithë zonën bregdetare të Sarandës.

LEXONI GJITHASHTU:

• Peshkatari në Pogradec kap koranin e “rrallë” me peshë 13 kg
• Kapi koranin “gjigand”, flet peshkatari: Pashë diçka të madhe në rrjeta, u habita