Kryeministri i Kosovës, Albin Kurti, e ka konsideruar me urgjencë dokumentimin e krimeve të kryera gjatë luftës në Kosovë.

Prandaj, Kurti u ka bërë thirrje të martën të gjithë qytetarëve që t’i përgjigjen pozitivisht procesit të regjistrimit të popullsisë – që zhvillohet prej 5 prillit deri më 17 maj të këtij viti – pasi për herë të parë, aty është përfshirë pyetësori për të dokumentuar dëmet nga lufta në ekonomitë familjare.

“Nuk kemi mangësi vetëm te shpërputhja e të dhënave, por thjesht edhe te mungesa e tyre”.

Ai ka thënë se në kaudër të procesit të regjistrimit, pyetësori do t’iu mundësojë qytetarëve që të dëshmojnë për pronat e shkatërruara, për dëmet në familjarë, qofshin ata të vrarë, të plagosur apo të zhdukur në periudhën 28 shkurt 1998 deri më 12 qershor 1999.

“Është urgjente çështja e adresimit të krimeve të kryera gjatë luftës, sidomos për shkak se me kalimin e viteve jemi duke i humbur dëshmitarët. Dëshmitë janë aty, mirëpo jemi duke i humbur dëshmitarët, sepse u bë çerekshekulli nga lufta e fundit në Kosovë”.

Në luftën e fundit në Kosovë, forcat serbe kanë vrarë më shumë se 13.000 persona dhe mbi 6.000 vazhdojnë të jenë të zhdukur.

LEXONI GJITHASHTU:

• Shqiptarët e Preshevës, Kurti bën bilancin e 3 viteve: S’po lihen në harresë
• Kryeministri Kurti: Po përgatitemi që Serbia të akuzohet për krime lufte