Kurti: Duhet marrëveshje për mbajtjen e zgjedhjeve të Serbisë në Kosovë

Për mbajtjen e  zgjedhjeve parlamentare dhe presidenciale të Serbisë në Kosovë, duhet të ketë një marrëveshje në mes të Republikës së Kosovës dhe asaj të Serbisë, ka thënë kryeministri i Kosovës, Albin Kurti.

Kurti i ka bërë këto deklarata gjatë një takimi virtual me ambasadorët dhe shefat e misioneve diplomatike dhe konsullore të Kosovës.

Kryeministri i Kosovës u ka thënë ambasadorëve dhe përfaqësuesve diplomatikë se “ne nuk dëshirojmë që t’ua pamundësojmë të drejtën e votës qytetarëve të Republikës sonë që kanë dyshtetësi, por në të njëjtën kohë nuk mund të veprojmë në kundërshtim me ligjshmërinë dhe kushtetutshmërinë e vendit”.

Kurti ka qenë në kontakt të vazhdueshëm me përfaqësuesit e vendeve të Kuintit.

Presidenti serb, Aleksandar Vuçic tha të hënën në një aktivitet parazgjedhor, se “qeveria e Kurtit kërkon nga Serbia të pranojë pavarësinë e Kosovës, në mënyrë që të lejohen zgjedhjet”, të cilat mbahen më 3 prill.

Më 15 janar, Kuvendi i Kosovës miratoi një rezolutë përmes së cilës u kundërshtua mbajtja e votimeve në Kosovë për një referendum të Serbisë për ndryshime kushtetuese.

Vendet e Kuintit dhe BE e nuk e pritën mirë vendimin e Qeverisë së Kosovës për këtë referendum.

Dy muaj më vonë, më 15 mars, Kurti tha se po punon për një zgjidhje për serbet e Kosovës që duan të votojnë në zgjedhjet parlamentare dhe presidenciale të 3 prillit në Kosovë.

LEXONI GJITHASHTU:

• Kurti thotë se po punohet për mbajtjen e zgjedhjeve të Serbisë në Kosovë
• Serbët në Kosovë të marrin pjesë në zgjedhje, thotë Chollet