Kurti: Kam dëgjuar se Jabllanoviç mori 1 milion € dhe 2 apartamente për t’u tërhequr

Kryeministri i Kosovës, Albin Kurti, i është drejtuar këtë të mërkurë qytetarëve serbë në Kosovë me një mesazh në gjuhën e tyre.

Kurti në mesazhin e tij tha se në Veri nevojiten zgjedhje të tjera, por ato duhet të jenë të lira dhe pa ndikimin e bandave kriminale.

Shefi i qeverisë në Prishtinë theksoi se tërheqja e kandidatëve të përfaqësuesve të komunitetit serb në Kosovë u bë me urdhër nga Beogradi.

Ai tha se Jabllanoviç, i cili e kishte të sigurt fitoren në Leposaviç, është tërhequr nga gara dy ditë përpara zgjedhjeve, pasi ka marrë një milion euro dhe dy apartamente në Beograd.

“Mund të mos jetë e vërtetë, por gjithsesi duhet të jetë bërë shumë presion apo ofertë shumë luksoze, gjë që e bëri Jabllanoviçin të thotë se nuk do të ‘gjuajë menjëherë penalltinë’”, është shprehur  Kurti.

Gjithashtu ai shtoi: “Përfaqësuesit e Listës Serbe, si dhe Jabllanoviç kanë thënë gjithfarë gjërash për Kosovën dhe për mua, por unë kam mbetur i gatshëm t’i pranoj si kryetarë komunash të ardhshëm.

Fatkeqësisht, nuk kam as fuqi e as vullnet t’i detyroj të dalin në zgjedhje. Tashmë kryetar i komunës është Lulzim Hetemi, derisa të zgjidhet një i ri.

Për këtë kemi nevojë për zgjedhje të parakohshme dhe një fushatë të hapur, të lirë, parazgjedhore në 4 komuna në veri. Pa një fushatë të ndershme dhe demokratike, nuk ka zgjedhje të ndershme dhe demokratike. Dhe kjo është arsyeja pse në radhë të parë nevojitet sundimi i ligjit, pra një mjedis ku nuk ka frikë dhe kriminelë. Kjo është ajo që ne duam dhe duhet ta vendosim së bashku. Me sundimin e ligjit, gradualisht mund ta zvogëlojmë numrin e policëve në ndërtesat komunale.

Nga ana tjetër, ne kemi nevojë për takime në Bruksel për zbatimin urgjent, të plotë dhe të pakushtëzuar të marrëveshjes bazë nga Brukseli, pjesë përbërëse e së cilës është Aneksi i Ohrit. Tash e kam të qartë se presidenti i Serbisë i ka thënë ‘Po’ marrëveshjes për të mos e nënshkruar dhe tani ankohet dhe pendohet që tha ‘Po’, se e pranoi atë marrëveshje, që do të thotë njohje de facto e Republikës së Kosovës”.

LEXONI GJITHASHTU:

• Kurti u drejtohet serbëve të Kosovës: Nevojiten zgjedhje të lira, pa kriminelë
• Komandanti i KFOR: Në Kosovë trupat e NATO-s shmangën një masakër