Kurti: Kur Vuçiç përmend vrasjet, flet për veten e tij

Kryeministri i Kosovës, Albin Kurti i është përgjigjur deklaratës së Presidentit të Serbisë, Aleksandër Vuçiç i cili tha ditën se Prishtina po përgatit sulme në veri.

Kurti u shpreh se Vuçiç është një autokrat i cili është i shqetësuar për progresin në Kosovë dhe se kur flet për vrasje, flet për veten e tij.

“Në bazë të fitores së shkurtit të vitit të kaluar por edhe të qeverisjes sonë të mirë unë jam kryeministër i shpresës dhe progresit, ndërsa në Serbi keni një president të frikës dhe kërcënimit. Kur ata flasin për dhunë e vrasje flasin për vete, flasin për imagjinatën, mendimet e planet e tyre, nuk flasin për Republikën tonë. Për Republikën tonë flasin institucionet e shtetit tonë”, theksoi Kurti.

Ai sërish akuzoi Serbinë se ka nxitur rritjen e tensioneve në veri të Kosovës më 31 korrik dhe 1 gusht, kur serbët lokalë, duke shprehur pakënaqësinë e vendimeve të Kosovës për targat dhe dokumentet serbe, bllokuan rrugët në veri.

Ditën e djeshme, Vuçiç deklaroi se nuk beson se takimi me delegacionin e Kosovës më 18 gusht në Bruksel do të ketë sukses. Sipas tij, Prishtina po përdor situatën në Ukrainë për të bërë fushatë kundër Serbisë.

LEXONI GJITHASHTU

• Prishtina dëshiron të sulmojë veriun e Kosovës, thotë Vuçiç
• Kurti: Serbia mund të na sulmojë, por ne jemi gati