Kurti mbështet sulmet në Venezuelë: Të rritet vëmendja ndaj aktorëve që provokojnë sigurinë

Kryeministri i Kosovës, Albin Kurti përmes një postimi në “Facebook” ka reaguar lidhur me sulmet e regjistruara të shtunën gjatë natës në Karakas nga SHBA-të. Kurti ashtu si presidentja Osmani ka theksuar mbështetjen e Kosovës ndaj SHBA-së dhe operacionit të zhvilluar në Venezuelë.

Kurti gjithashtu shkruan se duhet të rritet vëmendja ndaj aktorëve rajonal që synojnë të kryejnë provokime me veprime kriminale dhe terroriste.

“Republika e Kosovës mbështet operacionin anti-narkotik të Shteteve të Bashkuara të Amerikës, të udhëhequr nga Presidenti Donald Trump, në Venezuelë. Mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie.

Kosova, si aleate strategjike e ShBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër cenimit të vlerave demokratike perëndimore nga aktorë përfaqësues (proxy) të kundërshtarëve të këtyre vlerave, si në rajonin tonë ashtu edhe më gjerë.

Në këtë kontekst, ritheksojmë nevojën për rritjen e vëmendjes ndaj aktorëve të caktuar rajonalë, të cilët në vazhdimësi synojnë provokimin e situatës së sigurisë përmes veprimeve hibride, kriminale, terroriste dhe ushtarake”, shkruan Kurti.