Kryeministri i Kosovës, Albin Kurti deklaroi se në Bruksel nuk ka pasur marrëveshje, por dakordësi për targat.

Deklaratën, Kurti e bëri këtë të enjte teksa mbante fjalën e tij në Kuvendin e Kosovës, gjatë seancës plenare.

“Marrëveshja e mbrëmshme nuk është marrëveshje për targat. Ne u morëm vesh t’i ndalojmë veprimet reciproke, pra ne nuk do të bëjmë gjobitje për targat KM, dhe do t’i japim hapësirë negocimit të propozimit evropian, që më herët quhej franko-gjerman”, theksoi ai.

Kryediplomati evropian, Josep Borell tha se më 23 nëntor, se Kosova dhe Serbia kanë arritur marrëveshje në Bruksel për targat.

Sipas BE-së, Kosova do t’iu japë fund veprimeve të mëtejme të lidhura me riregjistrimin e makinave, derisa Serbia nuk do të lëshojë më targa me emra të qyteteve të Kosovës.

Pas arritjes së marrëveshjes për targat, Borell paralajmëroi se në ditët në vijim do t’i ftojë liderët e të dyja shteteve në Bruksel për të diskutuar për “Propozimin e Brukselit”, të mbështetur nga Franca dhe Gjermania.

LEXONI GJITHASHTU

• Vuçiç: Fitore e vogël taktike në Bruksel, pritet presion më i madh
• Kosova dhe Serbia arrijnë marrëveshje për targat
• Ambasadori i SHBA në Kosovë: Marrëveshja me Serbinë shton sigurinë