Kurti: Serbia po kërkon të vazhdojë luftën të cilën e humbi

Kryeministri i Kosovës, Albin Kurti deklaroi se Serbia po kërkon të vazhdojë luftën, të cilën e humbi 23 vite më parë.

Deklaratën, Kurti e dha në një konferencë për mediat këtë të diel në Prishtinë.

Sipas tij, Serbia po kërcënon me luftë dhe me rikthimin e trupave të saj ushtarake, të cilat kryen gjenocid në Kosovë.

“Ajo që ne e dinim në të vërtetë gjatë gjithë kohës u shpërfaq në mënyrën më të egër të mundshme dhe përkundër të gjithë atyre të cilët mendonin ndryshe. Pas 23 vitesh nga përfundimi i luftës në Kosovë, Serbia kërcënon sërish me luftë dhe me rikthimin e trupave të saj ushtarake, të cilët para gati çerek shekulli patën kryer gjenocid kundër popullit tonë dhe dogjën e shkatërruan pronën dhe pasurinë tonë”, u theksoi ai.

Misioni i Bashkimit Evropian për Sundimin e Ligjit në Kosovë, EULEX, ka konfirmuar se një shok bombë është hedhur ndaj një patrulle vëzhguese mbrëmjen e së shtunës, në afërsi të Rudarës, në komunën e Zveçanit.

EULEX-i bëri të ditur se asnjë zyrtar i Njësisë Policore të Specializuar nuk është lënduar dhe nuk janë shkaktuar dëme materiale, por i cilësoi sulmet e tilla të papranueshme.

Ndër të tjera, EULEX-i njoftoi do të vazhdojë punën për ruajtjen e stabilitetit në Kosovë dhe për sigurinë e qytetarëve.

LEXONI GJITHASHTU

• ‘Shmangni përshkallëzimin’, Borrell reagon pas sulmit ndaj EULEX-it në veri
• ‘Kosova do të mbrohet me forcë dhe vendosmëri’, Kurti i përgjigjet Vuçiçit
• Petkoviç: Serbët janë ngopur me terrorin e Kurtit, nuk durojnë më