Kurti: Targat e Kosovës po qarkullojnë lirshëm e pa pengesa në territorin e Serbisë

Qeveria e Kosovës njoftoi të enjten vonë se ka vendosur ta shfuqizojë vendimin për vendosjen e letrës ngjitëse në automjetet me targa serbe.

Kryeministri i Kosovës Albin Kurti deklaroi vendimi për lëvizjen lirshëm të automjeteve me targa serbe erdhi pas zbatimit të plotë dhe pa pengesa të vendimit në Serbi.

Përmes një shkrimi në Facebook, Kurti tha se nëse do të ketë ndryshim të qasjes nga autoritetet serbe, shteti i Kosovës do të veprojë.

“Nga raporti i policisë sonë e cila ka monitoruar gjithçka me shumë vëmendje jemi njoftuar që kemi zbatim të plotë, dhe se nuk ka pasur incidente a pengesa. Andaj, bazuar në parimin e reciprocitetit si një premisë e rregullimit të marrëdhënieve të shteteve të pavarura, mbrëmë morëm vendim që njësoj të lejohen edhe automjetet që vijnë nga ana tjetër e kufirit me targa të Serbisë”, tha Kurti duke theksuar se ky fillon të zbatohet pas publikimit në Gazetën Zyrtare.

“Në rast se Policia e Kosovës ndërkohë pranon raportime nga terreni për ndryshim të qasjes a sjelljes nga autoritetet e Serbisë për lejimin e lëvizjes së lirë të automjeteve me targa të Republikës së Kosovës në territorin e Serbisë, apo pengimin e lëvizjes së lirë në çfarëdo forme, ne do të njoftohemi me kohë dhe do të veprojmë”, shtoi Kurti në reagimin e tij.

LEXONI GJITHASHTU:

• Kosova pranon targat serbe, vendimi pas lëvizjes së parë të bërë nga Beogradi
• Serbia lejon targat e Republikës së Kosovës
• Njohja e targave të Kosovës nga Serbia, reagon Bashkimi Europian