Serbia lejon targat e Republikës së Kosovës

Qeveria e Serbisë ka marrë vendim që të mundësojë lëvizjen e lirë të të gjitha automjeteve nga Kosova në territorin e Serbisë.

Për një gjë të tillë, Serbia ka rënë dakord  me marrëveshjen e vitit 2011, të arritur mes përfaqësuesve të Kosovës dhe Serbisë në dialogun e ndërmjetësuar nga Bashkimi Evropian.

Duke bërë me dije lajmin Drejtori i Zyrës për Kosovën në Qeverinë e Serbisë, Petar Petkoviç theksoi se ky vendim nuk mund të kuptohet si njohje e pavarësisë së Kosovës, por që u lehtëson jetën më shumë qytetarëve serbë.

Petkoviç nënvizoi se një njoftim se Serbia nuk e njeh Kosovën do të vendoset në të gjitha pikat kufitare dhe administrative.

Ai gjithashtu bëri të ditur se vendimi do të hyjë në fuqi nga 1 janari, por nuk specifikoi nëse targat e makinave nuk do të mbuloheshin më me letra ngjitëse kur ta kalojnë kufirin – siç ndodh aktualisht.

Çështja e targave ka shkaktuar kriza në veri  të Kosovës vitin e kaluar, që çuan në protesta, daljen e serbëve nga institucionet dhe vendosjen e barrikadave duke kulmuar më pas me ngjarjen në Banjskë.

LEXONI GJITHASHTU:

• Kurti: Radojiçiç me ushtrinë serbe po përgatitet për sulme të reja në Kosovë
• Deputeti serb sulmon Kurtin: Kokëfortë dhe diktator si Vuçiçi, po dëmtojnë Veriun