Kurti thirrje serbëve: Aplikoni për punë në institucionet e Kosovës

Kryeministri i Kosovës, Albin Kurti i ka bërë thirrje komunitetit serb që të aplikojë për punë në institucionet e vendit.

Gjatë fjalës së tij në një deklaratë për mediat në Prishtinë, Kurti u shpreh se pas dorëheqjes së serbëve në Veri, kërkon që në institucione të punojnë sërish serbë.

“Zbrazëtinë që ekziston brenda institucioneve tona të përbashkëta pas dorëheqjes kolektive dhe kryesisht të detyruar, të disa qindra serbëve, ne nuk duam ta mbushim me shqiptarë. Prandaj, i ftoj të gjithë serbët nga Kosova që të aplikojnë për këto vende pune, veçanërisht serbët që nuk kanë pasur asnjë shans deri më tani”, theksoi ai, teksa bëri një adresim në gjuhën serbe.

Në nëntor, qindra serbë në veri të Kosovës u larguan nga Policia e Kosovës, institucionet e drejtësisë dhe institucionet lokale e qendrore.

Dorëheqjet u dhanë në shenjë pakënaqësie ndaj një vendimi të qeverisë së Kosovës që kishte të bënte me rirregjistrimin e makinave me targa serbe, në ato RKS, Republika e Kosovës.

LEXONI GJITHASHTU

• Haradinaj: Gjendja në Veri mund të përshkallëzohet dhe të dalë jashtë kontrollit

• Reagon Kremlini: Nuk po e shtyjmë Serbinë që të nxisë tensione në Kosovë
• Tensionet në Veri, Kurti: Nuk do të bisedojmë me kriminelët, do t’i arrestojmë