Kush është 55-vjeçari që ndihmoi vajzën të mbyste babanë, dyshohet për lidhje intime

Detaje të reja kanë dalë në dritë në lidhje me ngjarjen e rëndë që tronditi mbrëmjen e së mërkurës fshatin Frashër të Patosit, ku 26-vjeçare Ermalinda Rama dyshohet se mbyti babain e saj, Anesti Rama.

Policia e Fierit njoftoi këtë të shtunë se ka vënë në pranga edhe një tjetër person të përfshirë në këtë krim. Bëhet fjalë për shtetasin Çlirim Dogani, 55 vjeç, i cili dyshohet se ka ndihmuar Ermalindën në ekzekutimin e të atit, duke e mbytur me një tel.

Sipas informacioneve paraprake të hetimit, dyshohet se mes Ermalindës dhe Doganit ka pasur një lidhje intime, e cila nuk miratohej nga babai i saj. Konfliktet e vazhdueshme për këtë marrëdhënie mund të kenë çuar në përshkallëzimin e situatës dhe në kryerjen e krimit.

Ermalinda Rama kishte lëvizur shpesh në zonën e Sukut të Roskovecit, ku punonte sezonalisht në serat bujqësore të fermerëve vendas. Pikërisht në këtë zonë, që përfshin fshatrat Suk 1, Suk 2 dhe Arapaj, dyshohet se ajo është njohur me Çlirim Doganin. Ky i fundit është i martuar dhe baba i disa fëmijëve.

Në dëshminë e tij para hetuesve, Dogani ka mohuar çdo përfshirje në krim, duke pretenduar se në momentin e ngjarjes ndodhej në një tjetër fshat. Megjithatë, policia vijon hetimet mbi dinamikën e plotë të krimit dhe po verifikon alibitë e të dyshuarve.

Ngjarja ka tronditur opinionin publik dhe komunitetin lokal, ndërsa hetimet për zbardhjen e plotë të motivit dhe rrethanave të ngjarjes vijojnë në drejtimin e Prokurorisë së Fierit.

LEXONI GJITHASHTU: 

• Vajza mbyti me tel babanë, flet kryeplaku i fshatit: E goditën para syve të mi
• Nënë e bijë mbytën me tel 56-vjeçarin, si tentuan ta fshihnin ngjarjen e rëndë