Kush ishte Ebrahim Raisi, presidenti i vijës së ashpër të Iranit

Presidenti i Iranit, Ebrahim Raisi 63 vjeç, i cili vdiq në një përplasje helikopteri, së bashku me kreun e diplomacisë, Hossein Amir Abdollahian, konsiderohej një politikan konservator.

Ai u zgjodh kreu i shtetit në zgjedhjet presidenciale të mbajtura në vitin 2021 dhe u konsiderua si pasardhës i mundshëm i liderit suprem të Iranit Ayatollah Ali Khamenei, me të cilin ishte i afërt, sipas mediave botërore.

Raisi fitoi gati 62 për qind të votave në zgjedhjet, të cilat u karakterizuan nga ndalimi i pjesëmarrjes së disa kandidatëve të moderuar, si dhe pjesëmarrja e ulët.

Ai mori pushtetin në një kohë kur Irani po përballej me një sërë sfidash, duke përfshirë problemet akute ekonomike, intensifikimin e tensioneve rajonale dhe ngecjen e negociatave për ringjalljen e marrëveshjes bërthamore me vendet perëndimore, kujton BBC.

Megjithatë, mandati i tij u shënua nga protesta anti-qeveritare në të gjithë Iranin në vitin 2022, si dhe nga lufta aktuale në Rripin e Gazës, e cila kontribuoi në konfliktin e Teheranit me Izraelin.

Raisi mbështeti një sulm ndaj Izraelit në prill, në të cilin më shumë se 300 dronë dhe raketa u qëlluan në vend në përgjigje të një sulmi izraelit që vrau gjeneralët iranianë në kompleksin e ambasadës iraniane në kryeqytetin sirian, Damask, më 1 prill.

Raisi është përballur gjithashtu me thirrje të vazhdueshme nga shumë iranianë dhe aktivistë të të drejtave të njeriut për një hetim mbi rolin e tij të dyshuar në ekzekutimet masive të të burgosurve politikë në vitet 1980.

Mediat perëndimore e përshkruajnë atë si një konservator ekstrem dhe Raisi mbështeti ndarjen gjinore islame, kontrollin e internetit dhe censurimin e kulturës perëndimore para dhe gjatë mandatit të tij.

Raisi mbajti disa poste në sistemin gjyqësor të Iranit, duke shërbyer si Zëvendës Shef i Drejtësisë nga 2004 deri në 2014, Prokurori i Shtetit nga 2014 deri në 2016 dhe Shef i Drejtësisë nga 2019.

Në vetëm 25 vjeç, Raisi u bë zëvendësprokuror në Teheran. Ai u zgjodh gjithashtu nënkryetar i Asamblesë së Ekspertëve, organi klerik prej 88 anëtarësh përgjegjës për zgjedhjen e liderit suprem të Iranit.

Si president, Raisi mbështeti pasurimin e uraniumit të Iranit në nivele afër nivelit të armëve.

Ai u lind në vitin 1960 në Mashhad dhe ndoqi gjurmët e babait të tij, i cili ishte teolog islam, dhe filloi të ndjekë medresenë kur ishte 15 vjeç.

Raisi mori pjesë në protesta kundër Shahut të Iranit të mbështetur nga Perëndimi, i cili u rrëzua në vitin 1979.

LEXONI GJITHASHTU:

• Vdiq pasi helikopteri i tij u rrëzua, kush ishte presidenti i Iranit Ebrahim Raisi
• Putin lavdëron lidhjet me Iranin në një takim me Raisin