Kuvendi i Kosovës mblidhet të enjten për dialogun dhe energjinë

Kuvendi i Kosovës do të mblidhet të enjten në seancën e rregullt plenare. Mes pikave të shumta të rendit të ditës do të jetë debati parlamentar për dialogun me Serbinë.

Këtë bëri të ditur, shefja e grupit parlamentar të Lëvizjes Vetëvendosje, Mimoza Kusari-Lila, pas mbledhjes së Kryesisë së Kuvendit.

Përfaqësuesit e opozitës kritikuan qeverinë për mos transparencë në raport me dialogun me Serbinë.

Në këtë seance do te votohet edhe rezoluta që kundërshton vendimin e Zyrës së Rregullatorit të Energjisë për shtrenjtimin e energjisë elektrike në Kosovë.

Në anën tjetër, grupi “Protestoj” ka njoftuar se protesta e thirrur për nesër kundër shtrenjtimit të energjisë elektrike në Kosovë, është shtyrë për të premten.

Deri sot, janë mbajtur dy protesta të kësaj natyre.

Dialogu

Pas tre muaj e gjysmë ndërprerje të dialogut mes Kosovës dhe Serbisë, kryenegociatorët e të dyja palëve do të takohen nesër në Bruksel.

Bisedimet do të zhvillohen nga zëvendëskryeministri i Kosovës, Besnik Bislimi dhe drejtori i zyrës për Kosovën në qeverinë serbe, Petar Petkoviç.

Takimi i fundit mes Kosovës dhe Serbisë u mbajt më 16 nëntor.

Drejtori i Zyrës për Kosovën në Qeverinë e Serbisë, Petar Petkoviç, tha sot se Prishtina gjatë gjashtë muajve të fundit po mundohet “ta çojë dialogun në absurditet të plotë”, duke theksuar se për dialog duhen dyja palët.

Ai tha për Radio Televizionin e Serbisë se Beogradi është i përkushtuar për dialog dhe se do të vazhdojë të insistojë në formimin e Asociacionin e Komunave Serbe, i cili nuk u krijua as pas nëntë vitesh që nga arritja e marrëveshjes në Bruksel.

LEXONI GJITHASHTU: 

• Kurti: Në 2 muajt e fundit kemi importuar 40% të energjisë