Kuvendi i Kosovës seancë për rritjen e çmimeve

Kuvendi i Kosovës do të mbajë sot seancë të jashtëzakonshme për rritjen e çmimeve në vend, e cila do të jetë e vetmja pikë e debatit.

Sikurse në vende tjera, edhe në Kosovë çmimet po pësojnë ndryshime të vazhdueshme, si pasojë e krizës botërore për shkak të konfliktit në Ukrainë dhe ndalimit të eksporteve të produkteve bazike nga disa shtete të rajonit.

Buka, vaji, mielli, derivatet e naftës, biletat e autobusëve dhe taksitë janë vetëm disa produkte dhe shërbime, të cilat janë shtrenjtuar në treg.

Një litër naftë ka arritur në 1.75 euro, ndërsa një litër benzinë në 1.66 euro.

Nga produktet ushqimore, një litër vaj, nga më pak se 2.00 euro, është bërë 2.39 euro; një bukë nga 0.40 euro është bërë 0.50 euro, një kilogram miell ka arritur deri në 0.99 euro dhe një kilogram sheqer po ashtu deri në 0.99 euro.

Seanca e sotme është thirrur nga opozita e vendit.

LEXONI GJITHASHTU: 

• Shtrenjtim apo abuzim me çmimet në Kosovë?