Zjarr i fuqishëm në magazinën e fabrikës në Elbasan, zjarrfikësja në vendngjarje

Një zjarr i fuqishëm ka përfshirë të martën magazinën e një fabrike që prodhon produkte higjienike në zonën e ish-Kombinatit Metalurgjik në Elbasan.

Flakët janë përhapur me shpejtësi në ambientet e magazinës, ndërsa nga vendi i ngjarjes ngrihen shtëllunga të dendura tymi, të dukshme edhe nga zona të largëta. Situata ka ngritur shqetësim në zonë, ndërsa ekziston rreziku i përhapjes së flakëve në objektet përreth.

Menjëherë pas marrjes së njoftimit, në vendngjarje kanë mbërritur forcat e Shërbimit Zjarrfikës dhe policia, të cilat po punojnë për izolimin dhe shuarjen e flakëve, si dhe për garantimin e sigurisë në zonë.

Deri më tani nuk raportohet për persona të lënduar, ndërsa shkaqet e rënies së zjarrit mbeten ende të paqarta. Policia ka nisur verifikimet për zbardhjen e rrethanave të ngjarjes, ndërsa autoritetet vijojnë përpjekjet për vënien e situatës nën kontroll dhe vlerësimin e dëmeve materiale.