Kuvendi shtyu mbledhjen e këshillit të mandateve, Bardhi: Shkelje flagrante e rregullores

Mbledhja e Konferencës së Kryetarëve mesditën e së enjtes është shoqëruar me debate mes përfaqësuesve të opozitës dhe mazhorancës lidhur me shtyrjen e mbledhjes së këshillit të mandateve për kërkesën e SPAK për Belinda Ballukun.

Deputetja e PD, Jorida Tabaku e cilësoi vendimin në njollë të zezë për kuvendin ndërsa kërkoi mbledhjen e menjëhershme të këshillit.

“Kjo që po ndodh është një njollë e zezë për Kuvendin. Mbrojtja politike e një të korruptuari është çështje që ju bën me turp edhe juve. Të mblidhet menjëherë Këshilli i Imuniteteve dhe t’i hapim rrugën drejtësisë për t’i hequr imunitetin.

Kreu i grupit të PD, Gazment Bardhi iu drejtua kryeparlamentarit Niko Peleshi duke e akuzuar për shkelje të rregullores.

“Zoti Peleshi, jeni në shkelje flagrante të Rregullores. E kemi kërkuar pesë herë mbledhjen e Këshillit të Imuniteteve, por e keni refuzuar. Vendosët ta mblidhnit më datë 28, por dy orë para mbledhjes, me një urdhër që përmbante të dhëna të rreme, e keni anuluar mbledhjen.

Kështu siç e keni shkruar, edhe pse jam i bindur se nuk e dini se çfarë keni shkruar, i bie që Këshilli të mblidhet pas dy muajsh. Mjafton të lexosh ligjin për funksionimin e Gjykatës Kushtetuese. Pra, ju thoni që do ta mblidhni Këshillin pas vendimit të Gjykatës Kushtetuese, ndërkohë që Gjykata ka më shumë se dy muaj kohë për t’u shprehur”, u shpreh Bardhi.

Në përgjigje të deputetëve të opozitës kreu i Kuvendit Niko Peleshi tha: “Shtyrja e mbledhjes është në përputhje me Rregulloren e Kuvendit. Në Këshillin e Mandateve vendimet nuk merren thjesht me shumicë, por çdo propozim i anëtarëve vlen. Me propozim të deputetëve anëtarë Taulant Balla dhe Bledi Çomo që kërkuan të presin vendimin e Gjykatës Kushtetuese, shtyva mbledhje”.