Largim nga puna pa motivacion, punonjës të hekurudhës në Durrës në protestë

Përmes një shkrese, drejtuesit e hekurudhës së Durrësit kanë njoftuar punëtorët për shkurtimin e vendeve të punës.

Ky vendim është marrë më datë 1 korrik, por u është komunikuar punonjësve 12 ditë më vonë, më datë 13.

Prandaj ata protestuan përpara drejtorisë qendrore. Teksa i druheshin ndonjë mase, punëtorët e linjave të hekurta refuzuan të prononcoheshin për mediat.

Jashtë kamerave, ata thanë se kanë dërguar ankesat në drejtori lidhur me arsyet e shkarkimit, mirëpo ende nuk kanë marrë asnjë përgjigje.

Në vend të kësaj përgjigjeje, drejtoria i delegon nga njëra zyrë në tjetrën.

“Euronews Albania” tentoi të komunikonte me drejtorin Gentjan Liko, por ky i fundit, jo vetëm që nuk pranoi të intervistohej, por nuk lejoi as hyrjen e kamerës brenda territorit të drejtorisë.

Aktualisht e vetmja linjë funksionale në HSH është ajo e Shkodër-Lezhë-Milot-Gjormë. Në ditë normale ajo shërben për transport mallrash, ndërsa gjatë 13 të Martave të Shna Ndout, transporton edhe pasagjerë.

LEXONI GJITHASHTU

• ‘Mos na penalizoni’, gjuetarët në protestë kundër propozimit të Kumbaros
• Protestojnë të verbrit, akuza ndaj bashkisë Durrës për kompensimet financiare