Larje hesapesh në Francë, granatë në lokalin turk, 12 persona të plagosur

Të paktën 12 persona mbetën të plagosur pasi një granatë u hodh në brendësi të një lokali në qytetin francez Grenobël, bënë të ditur autoritetet lokale.

Ngjarja ndodhi në lokalin e quajtur “Aksehir” dhe si pasojë e shpërthimit dy nga të plagosurit janë në gjendje të rëndë.

Motivet e sulmit janë ende të paqarta, por hetuesit dyshojnë se mund të bëhet fjalë për larje hesapesh.

Prokurori i çështjes deklaroi se nga dëshmitë paraprake rezulton se personi i dyshuar që hodhi granatën brenda lokalit ishte i pajisur edhe me një automatik të tipit Kallashnikov.

“Nuk ka të dhëna që të na bëjnë të mendojmë se bëhet fjalë për një sulm terrorist. Ngjarja është më tepër një akt ekstrem dhune”, deklaroi Francois Touret.

Zyrtari shtoi se hetuesit po shqyrtojnë mundësinë që episodi të jetë i lidhur me trafikun e drogës.

Autoritetet thanë gjithashtu se persona të shumtë ndodheshin pranë lokalit, në lagjen Fshati Olimpik i qytetit, kur i dyshuari hyri për pak momente në ambientet e brendshme.

Rreth 80 zjarrfikës dhe oficerë policie u vendosën në vendngjarje, e cila mbeti e rrethuar nga shiritat e policisë.

Lokali ishte një pikë ku banorë vendas e të huaj mblidheshin për të parë kryesisht ndeshjet e futbollit. Zona do të mbetet nën mbikëqyrjen e policisë.

LEXONI GJITHASHTU:

• Ukraina pranon avionët e parë luftarakë francezë, Mirage 2000
• Festivali i Kanës 2025, aktorja e njohur franceze emërohet presidente e jurisë