Lavrov:  Rusia është e hapur për negociata serioze për Ukrainën

Ministri i Jashtëm rus, Sergej Lavrov tha se presidenti rus Vladimir Putin ka riafirmuar vazhdimisht se Rusia mbetet e hapur ndaj negociatave për Ukrainën, me kusht që ato të jenë serioze dhe me përmbajtje konkrete.

Sipas Lavrovit, Putin e ka përsëritur këtë qëndrim edhe gjatë dy javëve të fundit në ngjarje të ndryshme, duke theksuar se negociatat janë të mundshme vetëm nëse palët e interesuara janë realisht të gatshme dhe kanë propozime të qarta për të paraqitur.

Ndërkohë, mediat ndërkombëtare raportojnë se vendet e Bashkimit Evropian po shqyrtojnë mundësinë e emërimit të një përfaqësuesi special për bisedimet e paqes në Ukrainë. Sipas Politico, ky përfaqësues do të kishte mandatin të negociojë me palën ruse në emër të BE-së, ndërsa presidenti i Finlandës, Alexander Stubb, përmendet si një nga kandidatët e mundshëm për këtë rol.