LDK fiton Prishtinën, Rama: Do të jem kryetar i të gjithëve

Kandidati i Lidhjes Demokratike të Kosovës, Përparim Rama është shpallur fitues në garën për Komunën e Prishtinës.

Rama mundi në një garë shumë të ngushtë kandidatin e Lëvizjes Vetëvendosje, Arben Vitinë.

Kandidati i LDK-së mori 51.07% të votave kurse Vitia i LVV siguroi 48.93% duke u ndarë me një diferencë prej vetëm 1701 vota.

Pak para pëfundimit të numërimit total të votave, Rama deklaroi para qytetarëve se do të mbajë të gjitha premtimet e dhëna në fushatë.

“Nuk mundem me i përshkru me fjalë emocionet e kësaj fitore. Falënderoj të gjithë LDK dhe kryetarin e guximshëm Lumir Abdixhiku. Kjo është fitore e zhvillimit. Zotohem që do të jem kryetar i të gjithëve, ju që jetoni këtu, punoni këtu, që vini e që do të ktheheni”, tha ai.

Pak minuta më pas kandidati i LVV, Arben Vitia pranoi humbjen duke thënë se Prishtina ka një kryetar të ri.

“Prishtina tashmë ka një fitues, e ai është zotëri Përparim Rama. Shfrytëzoj rastin të falënderoj aktivistët e LVV-së, qytetarët e Prishtinës dhe zotëri Rama po ashtu për një kulturë të përgjithshme dhe fushatë korrekte që karakterizoi Komunën e Prishtinës”, tha Vitia.

LEXONI GJITHASHTU:

• LDK e PDK marrin nga 5 komuna, LVV siguron 4 fitore
• Kandidati më i ri i LVV-së mund veteranin e LDK-së në Gjilan
• AAK fiton Gjakovën, Ardian Gjini rikonfirmohet në detyrë
• Shaqir Totaj nga Partia Demokratike e Kosovës fiton Prizrenin