LDK: Sveçla fotografoi aktivistin tonë pa pëlqimin e tij, shenjë e panikut

Lidhja Demokratike e Kosovës, LDK reaguar lidhur me fotot e publikuara të një qytetari nga ministri i Punëve të Brendshme në Kosovë, Xhelal Sveçla. LDK në reagim dënon ashpër sjelljen e ministrit të cilën e ka cilësuar të papranueshme, arrogante dhe kërcënuese ndaj aktivistit të tyre.

Sipas tyre, Sveçla fotografuar pa pëlqimin e tij, aktivistin e LDK-së. Më tej në reagim ata theksojnë se është një veprim i ndaluar me ligj dhe përbën shkelje të të drejtave themelore të qytetarëve. Sipas LDK-së ky veprim është shenjë e qartë e panikut dhe humbjes së kontrollit politik.

“Lidhja Demokratike e Kosovës dënon ashpër sjelljen e papranueshme, arrogante dhe kërcënuese të deputetit Xhelal Sveçla ndaj një aktivisti tonë, i cili po qëndronte qetësisht në trotuar. Përveç tjerash ka ndaluar atë dhe e ka fotografuar pa pëlqimin e tij, veprim ky i ndaluar me ligj dhe përbën shkelje të të drejtave themelore të qytetarëve.

Një reagim i tillë, i shoqëruar me tone agresive dhe sjellje denigruese, është shenjë e qartë e panikut dhe humbjes së kontrollit politik të atyre që për vite kanë keqpërdorur institucionet e shtetit, e sot ndjehen të zhveshur nga mbështetja qytetare. Përballë qytetarëve dhe simboleve tona, z. Sveçla ka zgjedhur arrogancën në vend të maturisë, kërcënimin në vend të kulturës demokratike.

LDK-ja thekson se aktivistët tanë, anëtarët tanë dhe çdo qytetar i Republikës së Kosovës ka të drejtë të jetoj e shprehet i lirë pa frikë, presion apo intimidim. Sjellje të tilla përbëjnë cenim të drejtpërdrejtë të standardeve demokratike dhe janë të papranueshme nga kushdo që ka mbajtur apo mban funksione publike.

I bëjmë thirrje institucioneve përgjegjëse që të sigurojnë një mjedis të qetë, të sigurt dhe dinjitoz për të gjithë qytetarët gjatë këtij procesi zgjedhor. LDK-ja mbetet e përkushtuar ndaj respektit, kulturës demokratike dhe standardeve që e kanë ndërtuar këtë vend”, shkruan LDK.

• LEXONI GJITHASHTU:
• Zgjedhjet në Kosovë, KQZ publikon shifrat: Sa ishte pjesëmarrja deri në orën 11:00
• Sveçla replika me qytetarin: Simbolet e LDK nuk lejohen para qendrës së votimit