Leo Ballhysa, lideri që shpëtoi Kukësin! Zbulohen klubet që e kërkojnë

Kukësi arriti të shpëtojë sezonin duke siguruar qëndrimin në Kategorinë e Parë, pas fitores 2-0 në përballjen direkte ndaj Butrinti. Një ndeshje vendimtare që i dha fund një edicioni të vështirë për skuadrën verilindore, e cila gjatë gjithë sezonit ka kaluar periudha me oshilacione të forta në rezultate dhe formë.

Kukësi arriti të mbështetet te disa nga talentet e rinj të ekipit, të cilët morën përgjegjësi në momentet më të rëndësishme dhe u kthyen në faktor vendimtar për objektivin e mbijetesës në kampionat.

Një nga emrat që spikati më shumë këtë sezon ishte 22-vjeçari Leo Ballhysa i cili u shndërrua në një nga liderët e skuadrës, duke dhënë kontribut të rëndësishëm me gola, asiste dhe paraqitje vendimtare në ndeshje kyçe të sezonit.

Edhe në sfidën e fundit ndaj Butrintit, Ballhysa ishte ndër lojtarët më të dalluar në fushë ndërsa dha asistin për golin e dytë të ndeshjes dhe njëkohësisht ishte i përfshirë në disa aksione të rrezikshme, duke i dhënë vazhdimësi sulmeve të Kukësit.

Ndonëse nuk ka qenë gjithmonë në qendër të vëmendjes mediatike, Ballhysa ka hyrë në historinë e Kategorisë së Parë shqiptare, pasi mban rekordin për golin më të shpejtë të shënuar ndonjëherë në këtë nivel, duke realizuar në më pak se 34 sekonda nga fillimi i lojës.

Ky sezon ka rritur ndjeshëm vlerësimin për të, ndërsa 22-vjeçari shihet si një nga talentet më premtues të futbollit shqiptar. Ai menaxhohet nga kompania SSM, e drejtuar nga Shkumbin Qormemeti dhe Haris Fakić, dhe pritet të jetë një nga emrat më të lakuar në merkaton e verës.

Ballhysa ka qenë më herët pjesë e disa skuadrave elitare të futbollit shqiptar, si Tirana, Dinamo City dhe KF Laçi, ku ka fituar eksperiencë të rëndësishme që në moshë të re në nivele të larta të kampionatit.