Lëvizja Vetëvendosje ripropozon Albulena Haxhiun për kryetare të Kuvendit të Kosovës

Lëvizja Vetëvendosje ka ripropozuar këtë të hënë Albulena Haxhiun për postin e kryetares së Kuvendit të Kosovës.

Kandidatura e saj u rikonfirmua gjatë seancës së sotme parlamentare nga deputeti i Vetëvendosjes, Glauk Konjufca por meqë ajo nuk ka marrë votat e nevojshme as në seancën e mëparshme, kandidatura e saj nuk është hedhur sot në votim.

Deputeti i Vetëvendosjes, Glauk Konjufca, deklaroi gjatë seancës se partia e tij do të presë për një marrëveshje politike përpara se të procedohet me votimin e Haxhiut si kryetare e Kuvendit.

“Meqenëse të gjitha subjektet politike janë shprehur që qëndrimi i tyre do të mbetet i njëjtë edhe në këtë seancë, mendoj se kjo situatë politike nuk mund të zgjidhet përveçse përmes një marrëveshjeje politike. Ashtu siç votohen nënkryetarët e Kuvendit, po ashtu duhet të ndodhë edhe për kryetarin. Pa krijimin e një mazhorance në Kuvend, nuk do të mund të themelohet vetë Kuvendi. E njëjta logjikë, sipas tij, vlen edhe për zgjedhjen e nënkryetarëve.”

Pas kësaj deklarate, kryesuesi i seancës, Avni Dehari, ndërpreu punimet dhe vendosi që seanca të vazhdojë të mërkurën më 23 prill 2025, në orën 10:00.

LEXONI GJITHASHTU:

• Sot mbahet seanca e katërt për konstituimin e Kuvendit të Kosovës
• Kosovë| Votohet raporti për verifikimin e mandateve, betohen deputetët e Kuvendit