Libani akuzon Izraelin për shënjestrimin e gazetares së vrarë në një sulm ajror

Kryeministri i Libanit ka akuzuar Izraelin për krime lufte, pasi zyrtarët thanë se sulmet ajrore izraelite vranë një gazetare dhe plagosën një tjetër në jug të Libanit të mërkurën.

Kjo vjen ndërsa Izraeli dhe Libani përgatiten të zhvillojnë një raund të dytë bisedimesh sot në Uashington.

Zyrtarët libanezë thonë se gazetaret Amal Khalil dhe Zeinab Faraj u shënjestruan qëllimisht, ndërsa kërkonin strehim në një shtëpi, pasi një sulm ajror fillestar goditi automjetin përpara tyre, duke vrarë dy burra.

Sipas raportimeve, gazetaret Amal Khalil dhe Zeinab Faraj u goditën gjatë një sulmi izraelit pranë fshatit al-Tiri në Libanin jugor, ndërsa raportonin nga vendi i ngjarjes.

Zeinab Faraj u shpëtua me lëndime dhe u transferua në spital, ndërsa Amal Khalil mbeti e bllokuar nën rrënoja, me ekipet e shpëtimit që nuk mundën ta arrinin për shkak të sulmeve të vazhdueshme dhe kufizimeve të aksesit.

Autoritetet dhe ekipet e shpëtimit kanë kërkuar leje urgjente për të lejuar Kryqin e Kuq Libanez të hyjë në zonë dhe të përfundojë evakuimin.

Reporterët pa Kufij paralajmëruan se jeta e Khalil ishte në rrezik të menjëhershëm, duke kërkuar presion ndërkombëtar për të lejuar që operacionet e shpëtimit të vazhdojnë.

Zyrtarët akuzuan gjithashtu Forcat Mbrojtëse të Izraelit (IDF) se kishin shënjestruar qëllimisht një ambulancë të shënuar, ndërsa ajo përpiqej të arrinte te gazetarët në fshatin Tayri.

Khalil, 43 vjeç, e cila u vra, punonte për gazetën libaneze Al-Akhbar. Ajo dhe Faraj, një fotografe e pavarur, po udhëtonin së bashku ndërsa dy burrat të paidentifikuar po ashtu vdiqën nga sulmet ajrore.

IDF mohoi se po i pengonte ekipet e shpëtimit të arrinin në zonë dhe tha se nuk i kishte vënë në shënjestër gazetarët.