Ish-drejtori i IT në Policinë e shtetit do të qëndrojë në “Arrest shtëpie”. Sipas dosjes së prokurorisë, Ervin Muça, ka marrë pa autorizim të dhënat e sistemit TIMS për hyrje daljet e të gjithë qytetarëve në pikat kufitare.

Ish drejtori i Teknologjisë dhe Informacionit në policinë e shtetit Ervin Muça u deklarua i pafajshëm në hyrje të Gjykatës së Tiranës.

Muça tha se nuk ka kryer asnjë veprim të kundraligjshëm për ndërhyrje apo për të kopjuar të dhëna në sistemin TIMS.

Megjithatë pas një seancë e cila zgjati rreth 60 minuta, gjyqtari Edvan Veçani rikonfirmoi masën “arrest në shtëpi” dhe “pezullim të një detyre apo të nje funksioni publik” me kërkesë të prokurores së Tiranës Anisa Qilimi.

Gjykata rrëzoi kërkesën e avokatit të Muçës, Bledar Meminaj i cili kërkoi që klienti i tij të hetohet pa asnjë masë sigurie pasi nuk ka asnjë fakt penal.

Ervin Muça akuzohet për “hyrje të paautorizuar kompjuterike”, sipas paragrafit të dytë që parashikon nga 3 deri në 10 vite burg. Sipas dosjes hetimore, mesnatën të 2 gushtit të kaluar, ish drejtori i lartë i policisë në bashkëpunim me persona të tjerë të paautorizuar tentuan të eksportonin të dhënat e sistemit TIMS, në një hard disk të jashtëm.

Për ekzaminimin e këtij hard disku, Prokuroria e Tiranës kërkoi ndihmën e laboratorit të prokurorisë së posaçme.

LEXONI GJITHASHTU:

• Ndërhyrja në TIMS| Mbahet seanca gjyqësore ndaj ish-drejtorit të IT, Muça: Spekulime
• Ndërhyrja në TIMS| Spahiu: Ja 3 arsyet, mund të jenë paguar 30-40 milionë euro
• Gazetari: E-maili që ngriti në këmbë ambasadat për ndërhyrjen në të dhënat e TIMS