Lirohen pas 2 javësh 300 nxënësit e rrëmbyer në Nigeri

Gati 300 nxënës nigerianë të rrëmbyer u liruan sot, dy javë pasi u rrëmbyen nga një shkollë në Nigerinë veriperëndimore, thanë zyrtarët.

Guvernatori i shtetit Kaduna, Uba Sani nuk dha detaje për lirimin e 287 studentëve që u morën me forcë nga qyteti i Kuriga më 7 mars, raporton AP.

Ai falënderoi Presidentin e Nigerisë, Bola Tinubu, që siguroi që fëmijët e rrëmbyer të ktheheshin në shtëpi të padëmtuar.

Qindra njerëz janë rrëmbyer vitet e fundit në Nigeri, veçanërisht në veri-perëndim të vendit, dhe grupet që kryejnë rrëmbimet në veri-perëndim janë të ndara nga grupi militant islamik Boko Haram në veri-lindje të Nigerisë, megjithëse ka pasur raportime se ata mund të kenë punuar së bashku ndonjëherë, sipas BBC.

Në Nigeri, në përpjekje për të parandaluar rrëmbimet, në vitin 2022 u miratua një ligj që e bën pagesën e shpërblimit një krim dhe dënon me të paktën 15 vjet burg, por deri më tani askush nuk është arrestuar për të.