Lirohet shtetasi i Bosnjës që u arrestua lidhur me arratisjen e biznesmenit rus

Një shtetas i Bosnjës, i arrestuar në lidhje me arratisjen e biznesmenit rus, Artyom Uss, nga Italia, është liruar dhe tani po bashkëpunon me hetuesit italianë.

Prokurorët amerikanë, ndërkaq, kanë hequr dorë nga kërkesa për ekstradimin e Vlladimir Jovançiqit, i cili po ashtu përballet me akuzë në Shtetet e Bashkuara se ka ndihmuar Ussin që të arratiset në mars të vitit 2023.

Lirimi i Jovançiqit nga paraburgimi në Kroaci, dhe ndalimi i procedurës së ekstradimit nga SHBA-ja – veprime për të cilat nuk ishte raportuar më herët – janë zhvillime të vogla, por të rëndësishme në hetimin që po vazhdon lidhur me atë që Uss – djali i një guvernatori rus – arriti të largohej nga Italia para se të ekstradohej në SHBA.

Uss ishte arrestuar nga Italia pasi Departamenti amerikan i Drejtësisë kishte ngritur akuzë ndaj tij për mbikëqyrje të një rrjeti trafikimi, që kishte transportuar teknologji ushtarake perëndimore në Rusi. Disa prej këtyre teknologjive përfunduan duke u përdorur në fushëbetejën në Ukrainë.

Arratisja e tij turpëroi autoritetet italiane dhe nxiti kritika nga kryeministrja Giorgia Meloni, e cila tha se kishte pasur “anomali” në vendime që çuan në arratisjen e Artyom Uss.

Jovançiq, 53 vjeç me shtetësi të Bosnje e Hercegovinës, është një prej tetë personave që prokurorët italianë kanë ngritur akuza në lidhje me arratisjen e Ussit.

Ai ishte arrestuar në dhjetor të vitit 2023 në Zagreb pasi prokurorët amerikanë siguruan një padi nga një juri e madhe për lidhjet e tij me arratisjen.

Që atëherë, Jovançiq ka bashkëpunuar me prokurorët italianë, duke u ofruar dëshmi në të dy raste.

Më vonë gjatë atij muaji, megjithatë, Jovançiq u lirua nga paraburgimi në Kroaci dhe u ekstradua në Itali, pasi arriti një marrëveshje për lirim, tha avokati i tij kroat, Gordan Preglej për Radion Evropa e Lirë. Kushtet e kësaj marrëveshjeje kërkojnë që ai të bashkëpunojë me zyrtarët italianë dhe për tre vjet të shërbejë në komunitet, tha Preglej.

Lirimi i tij po ashtu ka përfshirë edhe një marrëveshje me prokurorët amerikanë për të ndërprerë procedurat e ekstradimit.

Një zëdhënës i zyrës së prokurorit në qarkun lindor të Nju Jorkut konfirmoi se procedurat për ekstradimin e Jovançiqit janë ndërprerë, por shtoi se akuzat ndaj tij ende janë në fuqi.

Ndërkaq, një zëdhënës i zyrës së prokurorëve në Milano nuk ka komentuar shkruan REL.

LEXO GJITHASHTU:

• Bosnja shpall 11 korrikun si ditë zie dhe ditë përkujtimore për Srebrenicën
• Champions League| Hidhet shorti i raundit të parë, Egnatia përballë Bosnjës