Lituania bllokon transitin drejt Kaliningradit, Moska: E paprecedent

Kremlini e ka quajtur të ‘paprecedent’ vendimin e Lituanisë për të bllokuar transitin e mallrave ruse drejt Kaliningradit. Zëdhënësi Dmitry Peskov u tha gazetarëve të hënën se vendimi është gjithashtu i paligjshëm.

“Vendimi është i paprecedent. Ai shkel çdo rregull. Ne e kuptojmë që kjo rrjedh nga vendimi i Bashkimit Evropian për të zgjeruar sanksionet mbi mallrat e transitit, por edhe kjo është e paligjshme. Situata është komplekse dhe kërkon një analizë shumë të thellë, e cila do të bëhet në ditët e ardhshme”, tha Dmitry Peskov, zëdhënës i Kremlinit.

Autoritetet në Lituani ndaluan kalimin transit të mallrave të sanksionuara nga BE në territorin e tyre, që përfshin të vetmen rrugë hekurudhore mes Rusisë mëmë dhe enklavës së Kaliningradit në detin Baltik. Mes mallrave të ndaluara janë qymyri, metalet, materialet e ndërtimit dhe teknologjia e avancuar.

“Nuk është Lituania ajo që po e bën këtë, por sanksionet evropiane që hynë në fuqi nga 17 qershori. Në këtë pikë, hekurudha informoi klientët e saj se nga kjo datë sanksionohen mallra si çeliku dhe ato derivate të naftës, që nuk do të lejohen të kalojnë përmes Lituanisë”, u shpreh Gabrielius Landsbergis, ministër i Jashtëm i Lituanisë.

Kaliningradi iu mor nazistëve gjermanë nga Ushtria e Kuqe në prill të 1945-s dhe iu dha Bashkimit Sovjetik në fund të Luftës II Botërore. Ai ndodhet mes dy vendeve të NATO-s, Polonisë dhe Lituanisë.

LEXONI GJITHASHTU:

• 100 ditët e para të luftës, Moska fitoi 930 mln euro në ditë nga karburantet
• Lituania bëhet shteti i parë i BE-së që refuzon importet e gazit rus