Partia Socialiste feston fitoren, Rama mesazh Bashës: Pranoje humbjen me dinjitet

Mbështetësit e Partisë Socialiste u mblodhën pasditen e kësaj të marte në sheshin “Skënderbej” në Tiranë për të festuar triumfin e zgjedhjeve të 25 prillit.

Kryetari i Partisë Socialiste, Edi Rama, para mbështetësve tha se kjo është fitorja më e vështirë, më e madhe dhe më e bukur.

“Kjo është fitorja më e vështirë, më e madhe dhe më bukur e Partisë Socialiste të Shqipërisë. Megjithë numrin marramendës të fletëve të pavlefshme ne e kemi thyer rekordin tonë. Ky është rekordi historik i kësaj skuadre të madhe të njerëzve të jashtëzakonshëm”, tha Rama.

Ai tha se ndihet krenar për qytetarët shqiptarë, të cilët i dhanë besimin me votë Partisë Socialiste.

“Më shumë se asnjëherë jam krenar për shqiptarët, që më urtësinë, me vendosmërinë dhe me votën e tyre kaluan një provë të madhe karakteri në këtë moment kaq sfidues për Shqipërinë. Fitoi karakteri ynë, si një forcë e pathyeshme edhe përballë fatkeqësive natyrore. Fitorja është e gjitha e juaja”, shtoi Rama.

Kryeministri i Shqipërisë kishte një mesazh për kundërshtarët politikë, ndërsa tha se për PS-në opozita e vetme është Partia Demokratike.

Ai kërkoi nga kreu i Partisë Demokratike, Lulzim Basha të pranojë humbjen me dinjitet duke thënë se PS-ja do ta ketë të shtrirë dorën e bashkëpunimit për të mirën e Shqipërisë.

“Lulzim Basha dhe Partia Demokratike bënë fushatën më të mirë në historinë e humbjeve të tyre. Ju them atyre se më shumë se kaq nuk bënin dot, madje bën më shumë se saç bënin normalisht. Mesazhi im i sinqertë për Bashën është ky: pranoje humbjen me dinjitet dhe me bindjen se nuk bëre dot çfarë deshe, pro bëre gjithçka munde. Me apo pa Bashën, opozita jonë e vetme është PD dhe fitorja jonë e madhe nuk na e bën më të vogël, por edhe më të madh që t’i shtrijmë dorën e një bashkëpunimi të sinqertë dhe pa paragjykim PD-së. Unë dua të jem kryeministri i të gjithë shqiptarëve, jo vetëm i socialistëve, por edhe i demokratëve”, tha Rama.