PS dhe LSI përmbyllin fushatën elektorale në qarkun Tiranë

Partia Socialiste dhe Lëvizja Socialiste për Integrim përmbyllin sot fushatën elektorale për qarkun Tiranë.

Mitingu përmbyllës i PS në sheshin ” Skënderbej” ka nisur në orën 18:00 me fjalën e disa nga kandidateve më të spikatura të PS në këtë qark, që nga Luljeta Bozdo, ministrja e Shëndetësisë Ogerta Manastirliu apo ajo e Infrastrukturës, Belinda Balluku.

Kryeministri Edi Rama dhe njëherësh drejtuesi i PS-së mbajti një fjalë përmbyllëse para simpatizantëve të PS të mbledhur në sheshin “Skënderbej”.

Ai tha se vota e shqiptarëve në 25 prilli ka vetëm një drejtim, Partinë Socialiste të Shqipërisë.

“Ata janë rruga e së shkuarës, Partia Socialiste e Shqipërisë është dera e të ardhmes. Në 25 prill është dita jo për të bashkuar kënaqësitë tona, por për të bashkuar të gjithë pakënaqësitë tona dhe për t’i thënë  njëri-tjetrit se ka plot arsye për të qenë të pakënaqur me ata që kemi bërë. Më 25 prill vota ka një drejtim, Partinë Socialiste”, tha ai.

Ndërkohë, mitingu i Lëvizjes Socialiste për Integrim në Tiranë, i parashikuar të niste po në orën 18:00 ka nisur rreth një orë me vonesë.

Kryetarja e LSI, Monika Kryemadhi bëri thirrje që qytetarët më 25 prill të votojnë për t’i dhënë fund tranzicionit.

“Shqipëria është sot në rrezik është e tradhtuar nga qeverisja prandaj në këto zgjedhje u bëj thirrje të gjithë juve nga ky shesh i bekuar që të mos ndaloni për asnjë moment në këto ditë për të çuar çdo njeri drejt kutisë së votimit për të votuar LSI”, tha ajo.

Qarku i Tiranës, i cili është qarku më i madh i Shqipërisë në zgjedhjet e 25 prillit do të çojë në Parlament 36 deputetë.

Drejtoria e Përgjithshme e Gjendjes Civile ka njoftuar se të drejtën e votës në zgjedhjet e 25 prilli e kanë 3,588,869 shtetas shqiptarë, nga të cilët 50.5 % e tyre janë votues meshkuj dhe 49.5 % janë femra.

Lexoni gjithashtu: 

Kryeministri Rama: Ata janë rruga e së shkuarës, PS është e ardhmja

Monika Kryemadhi: Më 25 prill votoni për t’i dhënë fund tranzicionit