Pezullimi i Ballukut, nis seanca në Kushtetuese! Kryeministria: SPAK shkeli ligjin

Këtë të enjte, në Gjykatën Kushtetuese po zhvillohet seanca plenare mes Kryeministrisë dhe SPAK mbi pezullimin e Belinda Ballukut. Pjesë e palëve janë edhe Kuvendi dhe Presidenca. Në fjalën e saj, përfaqësuesja e Kuvendit e ka quajtur vendimin cenues të parimit të ndarjes së pushtetit.

“Vendimi i Gjykatës Kushtetuese për të legjitimuar ndërhyrjen e gjykatës në pushtetin ekzekutiv krijon një situatë ku pushteti gjyqësor ndërhyn në pushtetin ekzekutiv, dhe kjo ndërhyrje është substanca e konfliktit të kompetencave, jo thjesht një mosmarrëveshje akademike mbi interpretimin e normave. Në vlerësimin e Kuvendit, ky vendim cenon parimin e ndarjes dhe barazimit të pushteteve të sanksionuar në nenin 7 të Kushtetutës në disa dimensione. Ndërhyrja gjyqësore sipas Kuvendit dhe ligjeve të tij ka dhënë votësimin dhe përbërjen e qeverisë të propozuar nga Kryeministri. Ky proces kushtetues nuk mund të anashkalohet nga vendim gjyqësor,” – tha përfaqësuesja e Kuvendit.

Jona Qosja, përfaqësuesja e qeverisë në Gjykatën Kushtetuese këtë të enjte, ka vijuar gjatë fjalës së saj duke argumentuar pse SPAK sipas saj ka shkelur Kushtetutën.

“Në lidhje me themelin e kërkesës. Deputeti gëzon imunitet, nuk mund të kontrollohet ose të arrestohet pa pëlqimin e Kuvendit. Nuk mund të arrestohet ose t’i hiqet liria në çfarëdolloj forme pa autorizimin e Kuvendit.

Autorizimi i Kuvendit kërkohet jo vetëm për masa kufizimi personal. Çfarë mbron imuniteti i deputetit, lirinë apo detyrën që kryen si deputet. Synon mbrojtjen e detyrës së deputetit. Në të kundërt nuk do kishte asnjë arsye pse Kushtetuta ta mbronte lirinë personale. Vetë GJK ka mbajtur qëndrimin se autorizimi nga Kuvendi është i nevojshëm për arrestin me burg dhe arrestin në shtëpi. Anëtarët e Këshillit të Ministrave po ashtu gëzojnë imunitet. SPAK nuk ka zbatuar jurisprudencës e Gjykatës Kushtetuese se ka sqaruar se edhe ministri që nuk është deputet, ka të njëjtin imunitet”-tha Qosja.

Jona Qosja, përfaqësuesja e qeverisë në Gjykatën Kushtetuese këtë të enjte, deklaroi se Kryeministria nuk është në proces për një ankim individual, por për sqarimin e kompetencave të pushteteve.

“GJKKO dhe SPAK pretendojnë se kërkesa nuk mund të ngrihet sepse nuk janë shqyrtuar të gjitha shkallët e gjykimit. Këshilli i Ministrave nuk është palë në gjykimin penal dhe nuk mund të ankohen për këtë.

Në përgjigje të këtyre pretendimeve, duhet theksuar se nuk bëhet fjalë për një ankim individual. Kërkimi i shkaqeve në këtë rast nuk lidhet me mbrojtjen e të pandehurve, por me raportin ndërmjet pushteteve, dhe ngrihet pyetja nëse gjykata penale ka të drejtë të pezullojë nga detyra një ministër, në të njëjtën mënyrë si mund të pezullojë një tjetër anëtar qeverie. Ne gjykojmë se jo.

Ne vijojmë si përfaqësues të qeverisë që na kanë pezulluar një anëtar të saj dhe fushën e veprimtarisë së tij. Vendimmarrja është pezulluar, dhe tani ministri nuk mund të propozojë aktet.”-tha Qosja.