“Loja e fundit”, një i arrestuar dhe dy të proceduar për baste sportive në Korçë

Ndërkohë që në vendin tonë qytetarë të shumtë vijojnë të luajnë me baste sportive në mënyrë të paligjshme, policia ndërmerr herë pas here aksione për evidentimin dhe goditjen e kësaj veprimtarie.

Në njoftimin e kësaj të hëne, policia thotë se ka goditur dy raste të tjera të lojërave të fatit në qytetin e Korçës, ku ka vënë në pranga një person, ndërsa të tjerët janë proceduar penalisht.

“Gjatë kontrollit të ushtruar në lokalin në pronësi të 43-vjeçarit, në lagjen nr. 8, Korçë, në celularët e shtetasve M.P. dhe G.A., u gjetën faqe për baste sportive. Gjithashtu, gjatë kontrollit të ushtruar në celularin e shtetasit Gj.M., në lokalin ku ndodhej në lagjen nr. 9, Korçë, u gjetën faqe për baste sportive”, njofton policia.

Gjatë aksionit “Loja e fundit” u sekuestruan edhe tre celularë, ndërsa në pranga ra 43-vjeçari M.P., banues në Korçë, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”.

Po ashtu, materialet u referuan në Prokurori, ku ka nisur procedimi penal për shtetasit G.A. dhe Gj.M., banues në Korçë.