Lojërat Botërore Olimpike Speciale, Shqipëria përfaqësohet nga 10 atletë

10 atletë me aftësi të veçanta do të përfaqësojnë Shqipërinë në Lojërat Botërore Olimpike Speciale që mbahen në Berlin. Përpara nisjes, delegacioni u prit nga kryetari i bashkisë së Tiranës, Erion Veliaj.

“Jam i sigurt që ju që tani jeni fitues, nuk ka rëndësi se sa medalje do të sjellim nga Berlini, por ajo qe ka rëndësi është sesa atletë do të çojmë në Berlin. Janë 10 yje që do shkëlqejnë dhe unë besoj që do frymëzojnë dhjetëra, e dhjetëra, e  qindra, e ndoshta mijëra të tjerë, që do ndjekin rrugëtimin tuaj, që do frymëzohen nga historia juaj. Mesazhi që ne duam të japim për çunat dhe gocat me nevoja speciale është që gjithkush është dikush. Edhe për ne të gjithë këta fëmijët janë dikush dhe janë shumë të rëndësishëm për qytetin tonë,” – u shpreh Veliaj.

Shtimi i gjithmonë e më shumë përfaqësuesve në lojërat speciale sipas kryebashkiakut është ajo çfarë duhet të synojmë.

“Edhe ekipi ynë olimpik i Lojërave Speciale, është po aq i rëndësishëm sa ekipi ynë i lojërave olimpike. Dhe ekipi ynë që shkon në Berlin këtë vit, është po aq i rëndësishëm sa ekipi që do shkojë në Paris në 2024-ën për të thyer rekordet atje. Kështu që, do të doja shume që teksa përgatitemi për këtë standard të ri, të mendojmë për një standard më të lartë.  Kemi kapur një majë mali, por çdo majë mali është rrëza e një mali tjetër, që është edhe më i lartë. E filluam me 2, jemi te 10, tani duhet të mendojmë që tani në këtë majë mali, si rrëzën e malit tjetër, që kur të vijën lojërat e tjera, ne të kemi jo 10, por 20, 30 atletë dhe jam i sigurt që do zgjohet edhe ajo ndjesi e filantropisë,” – u shpreh Veliaj.

Në 2019-ën, Shqipëria përfaqësohej në Lojërat Botërore Olimpike Speciale nga vetëm 2 atletë që garonin në 2 disiplina, not dhe atletikë.

LEXONI GJITHASHTU:

• Lojërat olimpike speciale, marrin pjesë 10 atletë shqiptarë me aftësi të kufizuara
• “Kosova zemra e Serbisë”, Komiteti Olimpik i Kosovës kërkon ndëshkimin e Gjokoviç