Luçiano Boçi: Dita të rrëzojmë nga froni regjimin

Deputeti i Partisë Demokratike Luçiano Boçi ka reaguar përmes një postimi në faqen e tij zyrtare në Facebook sa i takon protestës së 12 nëntorit.

Sipas tij sot është dita e shpresës, dita e qytetarit që kërkon të dëshmojë që në këtë vend ka njerëz që e duan familjen, shoqërinë dhe atdheun.

Në këtë ditë Boçi thotë se të gjithë do të kenë mundësi të shprehin zemërimin dhe revoltën kundrejt padrejtësive.

“Të gjithë solidarë për të zbritur nga froni politikën antiqytetare, politikën arbitrare, politikën që instalon regjimin, politikën që shkatërron vendin e jetën! Duam një politikë me pamje njeriu, me shpirt njerëzor, një politikë shërbyese dhe të përulur, politikë që zgjidh probleme dhe që krijon të mira dhe tregon përkujdesje,” – shkroi Boçi.

Këtë të shtunë, në orën 16:00 do të mbahet protesta kombëtare e opozitës para Kryeministrisë.

Për mbarëvajtjen e protestës, do të jenë në gatishmëri rreth 1000 efektivë policie, teksa disa akse rrugore do të jenë të mbyllura që prej orës 15:00.

Kryetari i Partisë Demokratike, Sali Berisha dhe funksionarë të tjerë demokratë, nuk kanë përjashtuar asnjë lloj skenari për protestën e sotme.

LEXONI GJITHASHTU:

• ‘Të gjithë në protestë’, Berisha: Sot është ora e shqiptarëve
• Rreth 1600 demokratë nga qarku i Korçës dhe 200 automjete nga Vlora për protestën