Lufta cenon importet, 5.8 mld lekë importohen nga Izraeli, 0.6% të importeve totale

Lufta në Lindjen e Mesme mund ti kushtoj Shqipërisë 5.8 mld lekë të humbura nga importet.

Kjo është shifra sipas databazës së INSTAT mbi kapitalin absolut të mallrave të importuara nga Izraeli në vitin e kaluar.

Shqipëria dhe Izraeli kanë në kurriz 32 vite marrëdhënie reciproke jo vetëm diplomatike por edhe tregtare. Shkëmbimet e mallrave midis dy vendeve janë intensifikuar vitet e fundit, ku vetëm vitin e kaluar, importet e mallrave nga shteti hebre janë rritur mbi 40.5% si dhe përgjatë viteve të fundit, ato janë dyfishuar.

Kategoritë e importeve që tregtohen në Shqipëri nga Izraeli janë nga më të ndryshmet. Lëndët djegëse minerare, nafta dhe nënprodukte zënë peshën më të madhe në produktet e importit, me mbi 90%. Vetëm vitin e kaluar janë importuar gjithsej 5,4 mld lekë lëndë minerare.

Materiale dhe produkte plastike si dhe instrumentet optike ose për fotografi janë dy kategoritë e dyta më të rëndësishme që importohen, me vlerë respektive 115.9 mln dhe 67.9 mln lekë.

Produktet izraelite zënë 0.6% të totalit të importeve që tregtohen në vendin tonë. Përqindja e peshës që zënë rezulton në rritje ndër vite, por lufta në zhvillim, mund të ngrejë shumë pikëpyetje për vijueshmërinë e marrëdhënieve tregtare.