Lulzim Basha uron Kosovën në 16-vjetorin e pavarësisë: Krenarë për zhvillimin e saj

Kryetari i Partisë Demokratike Lulzim Basha ka uruar me anë të një postimi në facebook, 16-vjetorin e pavarësisë së Kosovës.

Basha është shprehur se ky është një moment ku duhet kujtuar me nderim dhe mirënjohje të thellë kombëtare komandanti legjendar i UÇK Adem Jasharin, arkitekti i Pavarësisë e gjithashtu duhet kurjtuar presidenti Ibrahim Rugova dhe mijëra bij e bija të Kosovës që sakrifikuan jetën e tyre për në altarin e lirisë së Kosovës.

“17 shkurti i vitit 2008 është padyshim një nga ngjarjet më të rëndësishme për shqiptarët që kurorëzon sakrificën shekullore të gjysmës së kombit për liri dhe pavarësi”, shkroi Basha në rrjetin social Facebook.

“Jemi krenarë për zhvillimin dhe progresin që Kosova ka arritur në këto 16 vite. Ajo sot ka ende sfida përpara, por jam i bindur se me vendosmërinë, përkushtimin dhe pjekurinë e lidershipit politik të Kosovës në bashkëpunim dhe me mbështetjen e partnerëve strategjikë, SHBA, BE, Britanisë së Madhe, do t’ia dalë me sukses për të ndërtuar një shtet të fortë, të zhvilluar dhe të integruar në institucionet ndërkombëtare dhe euroatlantike”.

“Kjo është një ditë shumë e veçantë edhe për mua personalisht dhe atë pjesë të familjes sime që si mijëra të tjera u dëbuan nga trojet e tyre. Jam i lumtur për çdo ditë që i’a kam dedikuar çështjes së Kosovës dhe falenderoj Zotin që ma ka dhënë mundësinë për ta bërë këtë edhe si një amanet i përcjellë brez pas brezi, sikundër sa të kem forcë dhe mundësi do të jem në krah të Kosovës për të ndihmuar në suksesin e saj. Gëzuar Kosovë e shtrenjtë! Gëzuar shqiptarë kudo në botë”.

LEXONI GJITHASHTU:

• Kosova feston 16 vite pavarësi, Kurti: Qoftë e fortë Republika jonë, ne i dalim zot
• 16 vite pavarësi, Begaj: Histori suksesi në Ballkan! Gëzuar Kosovë
• Presidenti Begaj letër urimi Vjosa Osmanit: Jemi pranë Kosovës, përballë çdo sfide