Macron: Njohja e shtetit palestinez synon të izolojë Hamasin, e vetmja zgjidhje

Presidenti francez Emmanuel Macron tha se njohja e shtetit palestinez nga Franca ka për qëllim të minojë Hamasin dhe të ofrojë palestinezëve një alternativë politike të besueshme.

Gjatë një interviste për emisionin “Face the Nation” të CBS,  Macron theksoi se ky akt nuk është një shpërblim për dhunën, por një mundësi për të krijuar një horizont politik për ata që kundërshtojnë ekstremizmin e Hamasit.

Macron deklaroi se objektivi i Hamasit nuk është krijimi i një shteti palestinez, por shkatërrimi i Izraelit. Ai shtoi se grupi ekstremist synon të minojë çdo mundësi për paqe dhe stabilitet dhe të përhapë dhunën kundër Izraelit dhe popullit të tij.

“Nëse duam të ndalim këtë luftë dhe të izolojmë Hamasin, njohja e shtetit palestinez dhe plani i paqes janë të domosdoshme. Është mënyra e vetme për t’i dhënë një zgjidhje politike një situate që duhet të marrë fund”, shpjegoi Macron. Ai theksoi se kjo nismë ka për qëllim forcimin e Autoritetit Palestinez dhe parandalimin e radikalizimit të mëtejshëm midis palestinezëve.

Macron pohoi se kjo nismë diplomatike është tashmë në rritje, me mbështetje ndërkombëtare, përfshirë një deklaratë të Nju Jorkut të mbështetur nga 142 shtete. “Po punojmë ngushtë me shtetet e Ligës Arabe dhe udhëheqësit e rajonit për të çarmatosur dhe çmontuar Hamasin,” shtoi ai.

LEXONI GJITHASHTU:

• Franca përgatitet të njohë Shtetin e Palestinës më 22 shtator
• Franca i kërkon OKB mbështetje për zgjidhje me 2 shtete, SHBA dhe Izraeli bojkotojnë