Mali i Zi bllokon kufirin për shqiptarët, për të huajt lëvizja e lirë

Mali i Zi ka vendosur të mbyllë kufirin me Shqipërinë pas rritjes së numrit të rasteve me Covid-19, por jo për qytetarët që paraqesin një analizë të 48 orëve të fundit ndaj virusit.

Ndërkohë për shtetasit e huaj, lëvizja është e lirë. Julian Vern, student në Gjermani prej ditësh ndodhej në Shqipëri.

“Kam 9 ditë në Shqipëri duke shijuar bukuritë e këtij vendi. Unë jam nga Gjermania dhe me sa kam dijeni dhe kam kontrolluar në internet ne lejohemi të kalojmë”, thotë ai.

I pasigurt nëse do lejohej të kalonte ai u drejtua pikës kufitare dhe pas kontrollit u lejua të vazhdonte udhëtimin e tij.

Ndryshe ndodhi me Gëzimin, me shtetësi kosovare dhe nënshtetësi italiane i cili nuk u lejua të kalonte.

Nuk ishin të pakët edhe udhëtarët e tjerë, qe nuk u lejuan të vazhdonin rrugën në drejtim të Malit të Zi.

Qytetarët e Shqipërisë, Kosovës, Bosnjës, Serbisë, Italisë etj., e kanë të ndaluar të vizitojnë Malin e Zi në rast se nuk paraqesin analizën për Covid, ndryshe nga vendi ynë, ku nuk ka asnjë kufizim sa i takon kalimit në pikat doganore.

Nga ky kufizim përjashtohen udhëtarët që kanë një funksion/nevojë thelbësore, si:

– profesionistët shëndetësorë, kërkuesit mjekësorë;

– personeli i angazhuar me transportin e mallrave dhe çdo personel tjetër transporti;

– diplomatët, stafi i organizatave ndërkombëtare, personeli ushtarak dhe punonjës të ndihmës humanitare gjatë ushtrimit të funksioneve të tyre;

– Kategori të veçanta pasagjerësh në tranzit;

– Personat që kanë nevojë për mbrojtje ndërkombëtare në Malin e Zi, ose për arsye të tjera humanitare.