“Mami ndërroi jetë nga kanceri”!, rrëfimi tronditës i Sabina Kodrës: Onkologjiku ishte një spital i tmerrshëm

Sabina Kodra, producente, ka qenë e ftuar këtë të dielë në Interview me Mirela Milori, e cila ka folur për episode nga jeta e saj. Kodra ka ndarë në Interview në Euronews Albania eksperiencën e saj të trishtueshme të ndarjes nga jeta të nënës në një kohë të vështirë. Ajo ka folur për kushtet me të cilat është ndeshur në spitale në ato kohë.

“Kam pas një moment shumë të vështirë mami ndërroi jetë nga kanceri dhe njerëzit vdesin, mamaja ime ishte 83 vjeç. Ne e deshëm dhe ajo jetoi e lumtur. Ne jemi kujdesur për të si për asnjë njeri në këtë botë, por java e fundit e jetës së saj, ishte një sëmundje e tmerrshme, traumatike për të gjithë. Më ka shkundur themelet momenti kur mami ishte ditët e fundit dhe duhet të shkonim te onkologjiku. Onkologjiku ishte një spital i tmerrshëm. Në një dhomë me 6 veta me 6 shtretër ishin dhe 6 familjarë, kur e vetmja gjë që dëgjoje vetëm rënkimet e tyre. Ishte një spital i tmerrshëm se Shqipëria nuk ka struktura mbështetëse për të sëmurët paliativ. Edhe unë duhet të laja me lot gjithë korridorin me lot të spitalit dhe t’i lutesha çdo mëngjes që mos të ma nxirrte maman nga spitali sepse s’kisha ku ta lija. Duhet t’i bëja serume morfina, sepse kishte një infermier për 24 pacientë. Çfarë është ajo shoqëri e cila nuk është kujdesur, dhe si ka mundësi që nuk ndërtuam një spital për të sëmurët paliati.”-tha Kodra.