Manjani flet për protestën: Vendimi i DASH për Berishën është në favor të Ramës

Juristi Ylli Manjani komentoi në emisionin Now në Euronews Albania vendimin e DASH lidhur me statusin non grata të Sali Berishës.

Sipas tij, kjo do të ishte një gjë e mirë nëse bëhet fjalë për një revokim të plotë, jo si përjashtim për të dhënë një mesazh.

Manjani u shpreh se sidoqoftë ky vendim i DASH është në favor të kryeministrit Edi Rama, që siç theksoi ka nevojë për partner politik, jo njerëz në rrugë.

“Është një gjë e mirë nëse vërtet është dizenjuar si lëvizje politike. Nëse është bërë si përjashtim, t’i japë një vizë për të dhënë një mesazh, është diçka, por e mira do të ishte revokim i plotë, se kjo gjë duhet të shkojë në vend. Nuk është çështje nderi të Berishës, por është arsyeja që shqiptarët që merren me politikë në këtë vend duhet të kuptojnë që fatet e Shqipërisë vendosen këtu, jo në dyer të ambasadash. Berisha nuk duhet të kishte asnjë lloj kompleksi ndaj kësaj. Janë dy gjëra të palidhura me protestën, nëse duam t’i lidhim, është në favor të Ramës se ai do partner politik, nuk do njerëz në rrugë”, tha Manjani.