Marrëveshja me Berishën do të firmoset brenda 24 orëve, thotë Meta

Kryetari i Partisë së Lirisë, Ilir Meta u shpreh se marrëveshja me kryedemokratin Sali Berisha për bashkëpunimin për zgjedhjet e ardhshme vendore do të firmoset brenda 24 orëve.

Në një deklaratë për mediat, Meta nënvizoi se kjo marrëveshje i intereson të gjithë shqiptarëve.

“Marrëveshja jonë, që tashmë është e përfunduar, është një marrëveshje që i intereson të gjithë shqiptarëve. Primare dhe referendum. Do të firmoset brenda 24 orëve. Me Berishën kemi dakordësi të jashtëzakonshme. Si e kemi dakordësinë? Për parimet e bashkëpunimit jo vetëm PD-PL, por të të gjithë faktorit opozitar”, theksoi ai.

Paraditen e kësaj të mërkure, Meta i shkoi në zyrë Berishës dhe u zhvillua një takim për më shumë se 30 minuta.

Pas takimit, Meta u shpreh se do të ketë referendum dhe primare të përbashkëta me Partinë Demokratike.

Ndër të tjera, ish-presideti bëri të ditur se i ka propozuar një emër Berishës, për kryetar të Këshillit Bashkiak të Tiranës, për zgjedhjet e ardhshme vendore.

Ai nënvizoi se Berisha e mirëpriti propozimin e tij, ndonëse nuk e bëri publik emrin.

LEXONI GJITHASHTU

• Meta: Berisha mban përgjegjësi për primaret, shqiptarët presin fitoren e opozitës
• Berisha dhe Meta firmosin nesër marrëveshjen për aleancën në zgjedhjet vendore
• ‘Super politikan’, Meta: I propozova një emër Berishës për ‘Parlamentin e Tiranës’