Masakrohet shqiponja në Përmet, kryqëzohet e gjallë (Video)

Një shqiponjë është masakruar në fshatin Bual në Përmet. Nuk dihen ende rrethanat apo autorët e kësaj mizorie, por në videon e siguruar nga Euronews Albania shihet shpendi i ‘kryqëzuar’ i gjallë në një gardh, në rrugët e fshatit.

Këmbët e saj janë të gjakosura, ndërsa shqiponja e kryqëzuar shikon personin që po e filmon këtë ngjarje.

Policia e Përmetit tha për Euronews Albania se pas publikimit të pamjeve ka nisur verifikime për gjetjen e autorëve.

Shpendi është marrë nga punonjësit e policisë dhe është dërguar për trajtim mjekësor të specializuar.

Euronews Albania mëson se disa organizata italiane për mbrojtjen e kafshëve janë interesuar për të kuruar shpendin e rrallë.

Ky nuk është rasti i parë kur kafshë të ndryshme keqtrajtohen, por rasti i Bualit në Përmet është dhe më i dhimbshëm, për shkak se keqtrajtohet shpendi që lidhet me identitetin kombëtar.

Njoftimi i policisë:

Shërbimet e Komisariatit të Policisë Përmet, specialistët e Agjencisë së Zonave të Mbrojtura dhe një veteriner, i shkojnë në ndihmë një shpendi (shqiponjë) që ishte keqtrajtuar në fshatin Buhal, rast për të cilin Policia u njoftua nga shtetasja S. L.

Vijon puna për identifikimin e shtetasit që ka plagosur dhe ka lidhur shpendin, në një portë, me qëllim balsamosjen të gjallë.

Rasti, me një impakt të lartë publik në rrjetet sociale, u vlerësua me seriozitet dhe menjëherë nga shërbimet e Policisë, të cilat vijojnë veprimet hetimore dhe procedurale për të identifikuar dhe për të nxjerrë përpara përgjegjësisë penale, autorin e këtij krimi që parashikohet dhe ndëshkohet nga neni 207/c i Kodit Penal.

Shpendi (shqiponja), aktualisht po merr ndihmë të specializuar mjekësore nga veterineri, i cili ka asistuar shërbimet e Policisë, gjatë veprimeve për lirimin e shpendit, nga porta ku ishte lidhur.

Policia e Shtetit fton qytetarët që të denoncojnë në numrin 112, çdo paligjshmëri që ata hasin. Reagimi ndaj të gjitha denoncimeve do të jetë i menjëhershëm dhe konform ligjeve.

LEXONI GJITHASHTU:

• Defekti i ashensorit i merr jetën 58-vjeçarit në Tiranë
• Vendosën muzikë të lartë, nën hetim 4 menaxherë lokalesh