Mashtrimet mijëra euro, publikohet foto e ish-drejtoreshës në Ministrinë e Turizmit

Personi që shihni në foto e mësipërme është Viola Sterjo, ish-drejtoresha e Mnistrisë së Turizmit e cila u arrestua këtë të mërkurë për mashtrim dhjetëra mijëra euro.

Hetimi për të ka nisur pas kallëzimeve të disa qytetarëve nga Korça për faktin se Sterjo u kishte marrë shuma të konsiderueshme parash me qëllim influencimin te institucionet shtetërore për dhënien e fondeve në favor të tyre.

Burime për Euronews Albania bëjnë me dije se Sterjo dyshohet se ka mashtruar 5 subjekte, duke u marrë shuma që variojnë dhjetëra mijëra euro.

Në 12 dhjetor 2022 në prokurorinë e Korçës është bërë një kallëzim nga një qytetar, i cili kishte një pronë në Voskopojë dhe që donte të ndërtonte aty një hotel. Ai përmes një të njohuri kishte takuar Viola Sterjon, punonjëse e AKSH-it në atë kohë, e cila i kishte premtuar se do të ndërhynte tek institucionet shtetërore për të përfituar një grand.

Fillimisht denoncuesi i ka dhënë Sterjos 57 mijë euro dhe 1 milion lekë. Por ky nuk është mashtrimi i vetëm i Sterjos, një tjetër qytetar nga Pogradeci gjithashtu ka bërë denoncim se i ka dhënë asaj shuma të ndryshme, si 9 dhe 28 mijë euro, në mënyrë që ajo të ndërhynte te institucionet shtetërore për të përfituar një grant prej 1.2 milionë euro për një bujtinë.

Një denoncues i tretë pohon se i ka dhënë Sterjos 160 mijë euro pasi ajo i ka premtuar një grant prej 2.2 milionë euro.