Nga kjo javë të detyrueshme kudo, mjeku Shpëtim Qyra tregon sa mbrojtje të japin maskat

Në një intervistë për Euronews Albania, mjeku mikrobiolog, Shpëtim Qyra foli rreth përdorimit të maskave duke i konsideruar ato si barriera mekanike për parandalimin e virusit.

Ai shpjegoi se efikasiteti i maskave ndryshon por sidoqoftë përdorimi i tyre është shumë i rëndësishëm mbi të gjitha për ata që janë mbartës.

Qyra solli në vëmendje se një maskë profesionale e ofron mbrojtjen deri në 98% ndërkohë që një maskë artizanale 50-60%.

Ndër të tjera mjeku sqaroi se ardhja e stinës së virozëve e bën edhe më të rëndësishëm përdorimin e tyre.

 “Të gjithë mund të kemi bërë një shëtitje pasdite dhe unë vërej që në vendet e ndalimit të semaforëve njerëzit grumbullohen dhe njerëzit janë pa maska”,- u shpreh mjeku Shpëtim Qyra dhe sqaroi në këtë mënyrë se përdorimi i maskës në ambiente të jashtme është mjaft i rëndësishëm për uljen e dozës së infektimit.

Vendosja e maskës do të jetë me detyrim në çdo ambient, të brendshëm apo të jashtëm dhe masa ndëshkimore në formë gjobe do t’i vijë çdo qytetari bashkë me faturën e dritave.

Dy ditë më parë kryeministri Edi Rama gjatë një konference për mediat së bashku me ministren e Shëndetësisë, Ogerta Manastirliu paraqiti masat anti-COVID të marra nga qeveria me qëllim përballimin e sfidës vjeshtë-dimër, me të cilën siç tha dhe ai po përballet e gjithë bota.

Kryeministri bëri me dije se vendosja e maskës do të jetë me detyrim në çdo ambient, të brendshëm apo të jashtëm dhe masa ndëshkimore në formë gjobe do t’i vijë çdo qytetari bashkë me faturën e dritave.

Lexoni gjithashtu: 

Masat anti-COVID, Rama: Nga java e ardhshme maska e detyruar kudo, gjoba do paguhet me faturën e dritave