Në një atmosferë festive dhe me praninë e përfaqësuesve më të lartë të politikës shqiptare, liderëve fetarë dhe trupit diplomatik në Tiranë, është festuar në ambasadën e Greqisë 202 vjetori i Ditës Kombëtare të vendit fqinj.

Në fjalën përshëndetëse ambasadorja greke, Kostantina Kamitsi deklaroi se Athina zyrtare do të vijojë mbështetjen për rrugëtimin e Shqipërisë drejt integrimit europian, duke e cilësuar atë si një garanci për zhvillimin e rajonit, por edhe sigurinë e BE-së.

“Që nga viti 2003 i samitit të Bashkimit Europian në Selanik ne kemi demonstruar mbështetjen tonë për rrugëtimin e Shqipërisë drejt integrimit europian. Të njëjtën gjë ne vazhdojmë ta bëjmë edhe sot. Duke marrë parasysh luftën në Ukrainë dhe pasojave që ajo ka sjellë, integrimi i plotë i vendeve të Ballkanit Perëndimor në Bashkimin Europian sa më shpejt, nuk është i rëndësishëm vetëm për vendet e rajonit, por edhe për sigurinë dhe stabilitetin e Europës”, tha ambasadorja greke në Shqipëri.

Ambasadorja Kamitsi u shpreh se minoriteti grek në Shqipëri dhe shqiptarët që jetojnë në vendin fqinj, janë garanci e raporteve miqësore mes dy vendeve.

“Greqia dhe Shqipëria ndajnë një rrugë politike të përbashkët për të forcuar me tej marrëdhëniet dypalëshe, zgjerojnë bashkëpunimin dhe të zgjidhin çështjet e mbartura. Minoriteti etnik grek në Shqipëri dhe numri i madh i komunitetit shqiptar në Greqi, janë ura lidhës te një raporti vëllazëror mes dy vendeve”, tha ajo.

Sipas saj raporti i ngushtë mes Shqipërisë dhe Greqisë është dalluar në kohërat më të vështira.

“Treguesi i marrëdhënieve të ngushta e të sinqerta është provuar nga të dyja palët në momentet më të vështira për të dyja vendet, siç ishte për Shqipërinë situata pas tërmetit në 2019, pandemia, dhe së fundmi tragjedia e përpjesës së trenave në Greqi”, përfundoi ambasadorja.