‘Mbështetje Ukrainës’, G7: Rusia, pasoja serioze nëse përdor armë të rrezikshme

Grupimi G7 ka paralajmëruar me “pasoja serioze” nëse Rusia përdor armë kimike, biologjike apo bërthamore në Ukrainë.

I mbledhur urgjentisht pas bombardimeve masive ruse ndaj infrastrukturës civile të Ukrainës, grupimi dënoi sulmet, përsëriti mbështetjen ekonomike dhe ushtarake për Ukrainën për sa kohë do të jetë e nevojshme dhe dëgjoi me kujdes paralajmërimin e presidentit Volodymyr Zelensky.

“Ju falënderoj të gjithëve për ndihmën e ofruar. Është shumë domethënëse. Por lideri rus, që ndodhet në fazën e fundit të qeverisjes së tij, sërish përshkallëzoi situatën. Kjo përbën një kërcënim për të gjithë ne” , tha Volodymyr Zelensky, president i Ukrainës

Zelensky akuzoi Rusinë se synon të përfshijë Bjellorusinë në luftë dhe i bëri thirrje G7-s që të përshpejtojë ndihmën ushtarake dhe të vendosë një mburojë ajrore kundër bombardimeve ruse.

Ndër të tjera, G7-a analizoi dhe dënoi aktet e sabotazhit ndaj infrastrukturave evropiane të energjisë.

E përballur me mbështetjen e grupimit për Ukrainën, Moska zyrtare paralajmëroi se pajisja e Kievit me armatime vetëm sa do të zgjasë vuajtjen e popullit ukrainas.

LEXONI GJITHASHTU:

• Erdogan dhe Putin pritet të takohen në Kazakistan
• Zelensky i kërkon G7-s të izolojë plotësisht Rusinë