Mbi 1.500 km katrorë të djegur, Mitsotakis bën bilancin e dëmeve në Parlament

Kryeministri grek Kyriakos Mitsotakis vlerësoi të enjten se sipërfaqet e djegura këtë verë nga flakët kalojnë përmasat e 1 mijë e 500 kilometrave katrorë. Dëmet më kolosale janë verifikuar në pyllin verior të Dadias, ku zjarret digjen prej 13 ditësh.

I kritikuar nga opozita e krahut të majtë, kryeministri konservator sërish fajësoi për katastrofën kushtet ekstreme të motit dhe krizën e klimës, pa lënë mënjanë valën e gjatë të të nxehtit që goditi vendin në korrik e që u pasua nga thatësira dhe erërat e ngrohta.

“Mbi 100 dronë do të monitorojnë zonat e rrezikuara, shpesh herë duke përdorur inteligjencën artificiale, kështu që ne mund të informohemi menjëherë nëse një zjarr bie. Gjithashtu do të vendosim sensorë për matjen e temperaturës dhe kamera në zonat arkeologjike dhe pyjet e rrezikuara. Ne do të regjistrohemi edhe në sistemet satelitore të avancuara, që do ta na japin informacion mbi progresin e zjarrit”, tha  Kyriakos Mitsotakis, kryeministër i Greqisë.

Po të enjten, mbi 100 zjarrfikës shtesë u vendosën në zonat e prekura nga flakët, duke e çuar totalin në 582, të mbështetur nga një flotë prej 10 avionësh dhe 7 helikopterësh nga 9 vende evropiane.

Zjarri i rënë më 19 gusht ka shkrumbuar shtëpi dhe sipërfaqe masive pyjore në rajonet Aleksandropolis dhe Evros, në afërsi të kufirit greko-turk.

LEXONI GJITHASHTU:

• Zjarret më të mëdha në histori, KE vë në punë mekanizmin “RescEU” për Greqinë
• Zjarrfikësit shqiptarë luftojnë me zjarret në Greqi, reagon Rama