Mbi 100 fëmijë në ditë në spital, virozat e stinës mbushin pediatrinë e Durrësit

Luhatjet e temperaturave kanë shtuar fluksin e fëmijëve që paraqiten me virozat e stinës në pediatrinë e spitalit Rajonal të Durrësit. Në urgjencën pediatrike çdo ditë regjistrohen të paktën 100 raste.

Me diarre, të vjella, temperaturë të lartë e imunitet të ulët fëmijët i drejtohen spitalit, nga ku mjeku pediatër Fatmir Shahini, konfirmon situatën e rënduar.

“Nga urgjenca raportohen përditë deri në 140 fëmijë të vizituar. Kryesisht 18 deri në 25 fëmijë mbahen me kartela ditore”, thotë mjeku.

Këshilla kryesore që jep për prindërit ai është të tregojnë kujdes dhe të mos neglizhojnë vizitat tek mjeku i familjes.

“Ende është problemi i vjetër që anashkalojnë mjekun e familjes. Nuk shkojnë tek ai, por vijnë me vrap te urgjenca dhe fëmijët ia transmetojnë virozat njëri-tjetrit”, apelon mjeku pediatër.

Për të parandaluar prekjen nga viroza mjeku këshillon gjithashtu që prindërit të tregohen të kujdesshëm në ambientet që frekuentojnë me fëmijët, si dhe të përdorin sa më shumë lëngje.

LEXONI GJITHASHTU:

• Fëmijët të prekur nga virozat, Kuli: 35 pacientë të shtruar në Pediatri
• Temperaturë e lartë, dhimbje grykësh e rrufë, fluks nga virozat e stinës në spitale