Mbretëresha Maxima e Holandës do të bëhet rezerviste në forcat e armatosura

Mbretëresha holandeze Maxima e Holandës do të bëhet rezerviste në forcat e armatosura të vendit, konfirmuan sot burime për shërbimin publik holandez NOS.

Sipas raportimeve, pas një trajnimi të shkurtër ushtarak, mbretëresha do të fillojë të punojë në ushtri me kohë të pjesshme, ndërsa ende nuk dihet se në cilën degë ose shërbim të forcave të armatosura do të punësohet.

Mbretëresha Maxima kohët e fundit ka fituar njëfarë përvoje brenda Policisë Ushtarake Mbretërore.

Në tetor të vitit të kaluar, ajo mori pjesë në një stërvitje ushtarake pranë Harderwijk, ku mbante veshur një uniformë kamuflazh dhe fytyra e saj ishte e kamufluar.

Mbretëresha 54-vjeçare aplikoi në afatin e fundit të mundshëm, pasi kufiri i moshës së sipërme për rezervistët është 55 vjeç.

Maxima nuk është anëtarja e parë e familjes mbretërore që bashkëpunon me Ministrinë e Mbrojtjes.

Trashëgimtarja e fronit, Princesha Amalia e Holandës, përfundoi së fundmi Trajnimin e Përgjithshëm Ushtarak në Kolegjin e Mbrojtjes dhe u gradua në gradën e kaporalit, dhe në ceremoni mori pjesë Mbretëresha Maxima.

Mbreti Willem-Alexander i Holandës ka një karrierë të gjatë ushtarake , thekson NOS, duke kujtuar se ai kreu shërbim ushtarak në Marinën Mbretërore dhe, përpara se të vinte në fron, mbajti grada të larta si oficer rezervist në Marinën, Ushtrinë, Forcat Ajrore dhe Policinë Ushtarake Mbretërore.

Rezervistët përfaqësojnë një pjesë fleksibile të forcave të armatosura holandeze dhe janë të angazhuar kryesisht në situata emergjente , të tilla si përmbytjet ose në rast lufte.